മാലിന്യത്തില്‍ നിന്ന് ഊര്‍ജം (വേസ്റ്റ് ടു എനര്‍ജി) ഉത്പാദിപ്പിക്കുന്ന സംസ്ഥാനത്തെ ആദ്യ കേന്ദ്രീകൃത മാലിന്യ സംസ്‌കരണപ്ലാന്റ് കഞ്ചിക്കോട്ട് ഈ വര്‍ഷം ഡിസംബറില്‍ കമ്മീഷന്‍ ചെയ്യും. പദ്ധതിയുടെ അറുപത് ശതമാനം ജോലികളും ഇതിനകം പൂര്‍ത്തീകരിച്ചതായി തദ്ദേശ സ്വയംഭരണ എക്‌സൈസ് വകുപ്പ് മന്ത്രി എം.ബി രാജേഷ് പറഞ്ഞു. പ്ലാന്റിലേക്കാവശ്യമായ മാലിന്യശേഖരണം സംയോജിപ്പിക്കുന്നതുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുന്നതിനായി കളക്ടറേറ്റില്‍ വിളിച്ചു ചേര്‍ത്ത വിവിധ തദ്ദേശസ്ഥാപന പ്രതിനിധികളുടെ യോഗത്തില്‍ അധ്യക്ഷത വഹിച്ചു സംസാരിക്കുകയായിരുന്നു മന്ത്രി. പ്രതിദിനം 200 ടണ്‍ ജൈവ, അജൈവ മാലിന്യങ്ങള്‍ സംസ്‌കരിക്കാനുള്ള ശേഷിയാണ് പ്ലാന്റിനുണ്ടാവുക. 150 കോടി രൂപ ചെലവഴിച്ച് നിര്‍മിക്കുന്ന പ്ലാന്റില്‍ ജില്ലയിലെ ഏഴു നഗരസഭകളുടെയും 22 ഗ്രാമപഞ്ചായത്തുകളുടെയും മാലിന്യം സംസ്‌കരിക്കും. കംപ്രസ്ഡ് ബയോഗ്യാസ് (CBG) ഉത്പാദനമാണ് ഇവിടെ പ്രധാനമായും നടക്കുക. പ്ലാന്റിന്റെ പ്രവര്‍ത്തനവുമായി ബന്ധപ്പെട്ട് ആശങ്കകളുണ്ടെങ്കില്‍ അത് പരിഹരിക്കും. ഹരിത കര്‍മസേനയുടെ പ്രവര്‍ത്തനം തടസ്സപ്പെടുകയല്ല; മറിച്ച് കൂടുതല്‍ ശക്തിയാര്‍ജിക്കുകയാണ് പ്ലാന്റ് പ്രവര്‍ത്തനം തുടങ്ങുന്നതോടെയുണ്ടാവുക. പ്ലാന്റ് വരുന്നതോടെ ഹരിത കര്‍മസേനയ്ക്ക് കൂടുതല്‍ വരുമാനം നേടാന്‍ കഴിയും. കേന്ദ്രീകൃത പ്ലാന്റുകള്‍ കാലഘട്ടത്തിന്റെ ആവശ്യമാണ്. വന്‍തോതിലുള്ള മാലിന്യം (Bulk Waste) ഉത്പാദിപ്പിക്കുന്നവരെയാണ് പ്രധാനമായും പ്ലാന്റ് ഉദ്ദേശിക്കുന്നത്. ജില്ലയിലെ കൂടുതല്‍ തദ്ദേശ സ്ഥാപനങ്ങളില്‍ നിന്നുള്ള മാലിന്യം ഇവിടെ സംസ്‌കരിക്കുന്നതിനുള്ള നടപടികള്‍ സ്വീകരിക്കുമെന്നും മന്ത്രി പറഞ്ഞു.
കഞ്ചിക്കോട് വ്യവസായ മേഖലയിലെ 11.5 ഏക്കര്‍ സ്ഥലത്താണ് പ്ലാന്റ് സ്ഥാപിക്കുന്നത്. പബ്ലിക്-പ്രൈവറ്റ് പാര്‍ട്ണര്‍ഷിപ്പ് (PPP) പദ്ധതിയായാണ് ഇത് നടപ്പിലാക്കുന്നത്. കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്മെന്റ് കോര്‍പ്പറേഷന്‍ (KSIDC) ആണ് ഈ പദ്ധതിയുടെ നോഡല്‍ ഏജന്‍സി. ബ്ലൂപ്ലാനറ്റ് ബേസ് സൊല്യൂഷന്‍സ് എന്ന കമ്പനിയാണ് പ്ലാന്റിന്റെ സാങ്കേതികപരമായ കാര്യങ്ങള്‍ കൈകാര്യം ചെയ്യുന്നത്. ഈ പ്ലാന്റ് വരുന്നതോടെ പാലക്കാട് ജില്ലയിലെ മാലിന്യ പ്രശ്‌നങ്ങള്‍ക്ക് വലിയൊരു പരിഹാരമാകുമെന്നാണ് പ്രതീക്ഷിക്കുന്നത്. തദ്ദേശ സ്വയംഭരണ സ്ഥാപനങ്ങള്‍ക്ക് മാലിന്യ സംസ്‌കരണത്തിനായി വരുന്ന വലിയ ചിലവ് കുറയ്ക്കാനും ഇത് സഹായിക്കും.
കളക്ടറേറ്റ് കോണ്‍ഫ്രന്‍സ് ഹാളില്‍ ചേര്‍ന്ന യോഗത്തില്‍ തദ്ദേശ വകുപ്പ് സ്‌പെഷ്യല്‍ സെക്രട്ടറി ടി.വി അനുപമ, ജില്ലാ കളക്ടര്‍ ജി. പ്രിയങ്ക, ശുചിത്വമിഷന്‍ എക്‌സിക്യുട്ടീവ് ഡയറക്ടര്‍ യു.വി ജോസ്, വിവിധ തദ്ദേശ സ്ഥാപന അധ്യക്ഷര്‍, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍.
High Contrast
Highlight Links
Cursor
Desaturate
Sitemap
മലയാളം
0471-2319831, 0471-2312730
